横滨作客曳热捧三箭W

　　周六下画日职早场，广岛三箭主场斗FC横滨。FC横滨作客唔掂，近9场输咗7场，当中近4场联赛1和3负共失7球，防守经常出现漏洞，而且球队今季2次对广岛三箭均输波，今场难有爆冷机会，主胜稳阵。

　　FC横滨最具名气当然係53岁「长青树」三浦知良，不过今季踢起咗几个后生仔，质素唔错，特别係中前线不乏人材，当中一美和成已经独当一面，上场主场后备入替奠胜嘅「千禧后」小将安永玲央亦属可造之材。不过，上述几位新星作战经验未足，而且都係中前场球员，FC横滨攻守失衡严重，今季联赛27场只有4场保持不失，球队似乎未能解决防线问题。

　　近3场客战食白果
　　除此之外，FC横滨作客成绩亦非常唔掂，近4战只得1和3负，近3场都入唔到波，虽然球队曾于9月底赢过浦和红钻，但其实再之前4场作客输晒，离开主场变得不堪一击，累积近9场作客输7场，今场作客广岛三箭难以看好。

　　广岛三箭伤兵唔多，近16场联赛亦只输过4场，所输畀嘅对手只係现时排前6嘅球队，表现正气。再者，三箭今季喺联赛及盃赛2次作客FC横滨均赢2比0，今场主场出击赢波係基本要求。