白礼顿射手归位W得

般尼仲未开斋颓爆
　　本周英超打头阵嘅，係提早上演嘅护级大战，包尾嘅般尼作客白礼顿。般尼从上季一度讲到有机会争欧洲赛资格，搞到依家新一季开咧6战仲未开斋，球队疲弱嘅攻力係致命原因，白礼顿虽然亦只得1胜，但7场联赛场场有波入，有力喺般尼身上全取3分。

　　般尼係疫情下细球会嘅写照，由于冇晒球迷同周边收入，球会经济损失高达5,000万镑（约5亿港元），夏天基本上并冇资金增兵，导致成绩亦一落千丈。英国传媒报道，般尼主席加利克已经准备卖盘割爱，对方係一名埃及商人。

　　般尼6场联赛仅入3球
　　般尼今季最大镬，係前锋把握力弱，6场联赛只入过3球，包括最近3场对西布朗、热刺同车路士都吞蛋。咁啱得咁桥，白礼顿喺季初都已经对咗呢3队，虽然只得1和2负，但3场都入到波，累积今季7场联赛入11球，而且场场都取得士哥，净係计把握能力已经睇到今场胜负分野。

　　白礼顿上场斗热刺，球队收起首席射手马奥比，连大军名单都冇份，据闻係因为呢名法国前锋过分自大，因性格问题成日同队友嘈交，畀领队朴达雪藏「内部停赛」，希望佢可以好好反省，今场马奥比将会重新列入大军名单，球队锋力增强，主场可以打爆般尼全取3分，主胜好路。