蜀葵防守曳挡唔住黄蜂

今晚日乙福冈黄蜂作客斗水户蜀葵。黄蜂上仗不敌磐田山叶，15场不败走势告终，现时同德岛漩涡一样係59分，但得失球唔及对手而退居次席，为争升班回气再杀过，可挫后防曳嘅蜀葵，客胜值捧。

　　疫情下今季日乙不设降班，头2名升上日职，不过赛程非常频密，几乎每星期都要踢2场。由于各队实力接近，榜首位置每隔一段时间就易主，例如季初由长崎成功丸领先，跟住到北九州向日葵霸头位，近期就有德岛漩涡同福冈黄蜂争崩头，可见竞争相当激烈。

　　黄蜂由9月初开始，踢出一段13胜2和佳绩，当中大部份胜仗都係赢1、2球，胜在悭力兼够稳定。不过长期不败都有代价，阵中一对攻防主力，包括西班牙前锋祖安迪加度及中坚杜格拉斯哥利近期齐齐累积8面黄牌停赛，结果上仗喺2位主力缺阵下，意外输畀磐田山叶1比2，今仗射手祖安迪加度复出，预计可重返胜轨。

　　失波多过榜尾

　　水户蜀葵现排联赛13位，佢哋特色係攻强守弱，今季攻入52球属日乙最多，但防守相当鬆散，踢咗30轮失47球，仲衰过榜尾FC爱媛，上仗就以1比4大败于成功丸脚下，今晚面对另一前列球队黄蜂，蜀葵有前冇后嘅踢法恶唔出样，客胜有捧场价值。