世杯外南美：巴西轰炸委内瑞拉

世杯外围赛南美洲区听朝亦有赛事，其中巴西会作客委内瑞拉。「森巴兵团」今次征召包括加比尔捷西斯、艾利臣比加等英超兵，人脚整齐，预料可以大胜包尾嘅委内瑞拉，直取让球客胜。

　　由于防疫问题，上轮国际赛英超球会拒绝放巴西球员为国出征，但「森巴兵团」依然两场赢晒，包括作客击败劲敌智利，可见巴西整体战出色，个别球员缺阵影响唔大。经过国际足协介入后，英超球会为免被罚，今次终于肯放人，只有同于利市搵食嘅罗拔图法明奴同李察利臣未获征召，其他如加比尔捷西斯、艾利臣比加、法宾奴泰华利斯、费特洛迪古斯及堤亚高施华等英超兵都有份，当然唔少得巴黎圣日耳门王牌尼马，巴西齐晒脚，胜算自然更加大，尤其系之前缺席嘅英超森巴兵亦要「将功补过」，相信今场会更加搏命。

　　委内瑞拉4连败劲颓

　　委内瑞拉虽然重召今季重返英超搵食嘅荷西朗顿，可惜状态低迷，近4仗全部输晒，包括世杯外3连败，呢3仗全部上半场已经落后，由头输到落尾，真系睇到都唔开胃，就算主场出击亦信唔过。加上巴西于今届世杯外8战全胜，其中6仗赢2球或以上，让球客胜捧得过。