「舰队」未回气老将捱细界

今晚西甲快车压轴尾场之一，皇马主场硬撼马略卡。「银河舰队」虽然连场报捷，但老将偏多兼有唔少伤兵，「快车赛期」难免未回得切气；马略卡例摆铁桶阵，遇强敌必更加保守，捧中位数2.5球嘅入球细最上算。

马略卡防守有料到

皇马今季由安察洛堤回巢掌舵，佢梗系信任一众旧部，例如宾施马、莫迪历、拿祖费南迪斯及丹尼尔卡华积，当然佢哋亦交足货，其中宾施马今季联赛已有6球进帐，难怪开咧5仗联赛取得4胜1和，排紧榜首。不过佢哋个个都年纪唔细，卡华积上仗对华伦西亚更加伤出，仲未计养紧伤嘅马些路、加里夫巴利同却奥斯，「肥安」向来不擅轮换，话咁快又要打「快车赛期」，呢班老将体力点都差啲。

马略卡有「韩日双星」李康仁同倒戈嘅久保建英助阵，但球队暂时表现麻麻，今季重返西甲后，踢咗5轮入得3粒咁大把，不过其中3仗保持清白之身，5仗全开2球或以下，可见呢支小岛球队颇有自知之明，用保守打法同列强周旋。值得一提，皇马近两仗击败国米及反胜华伦，都系靠末段入波奠胜，搏到好尽未回气，今场随时踢「老鬼波」拖慢比赛节奏，睇定嚟食，入球细有逾2倍分头，非常值博。