世杯外：英格兰叹慢板吼半细

I组分组赛，英格兰主场迎战安道尔。牌面睇安道尔当然唔系英格兰对手，「三狮兵团」赢波相信系简单任务，亦畀机会主帅修夫基进行轮换，不过佢哋主场反而踢得仲绑手绑脚，近8次主场出击，7次半场总入球开1球或以下，1.5球半场细有好指数玩得过。

　　「三狮兵团」主帅修夫基习惯进行轮换，尤其今仗对手安道尔牌面较弱，相信佢会选择畀主力充分休息，以应付周中对波兰嘅大战。综合英格兰当地消息，上仗阵容只保留比克福特、史东斯同基亚利殊3人，修夫基今仗会起用多位年轻球员，包括18岁嘅多蒙特中场祖迪比宁咸，以及首度入选嘅列斯联前锋班福特，等将来有更多筹码喺手。

　　呢班第二梯队当然有足够活力及实力应付安道尔，不过英军喺温布莱球场作赛，大批球迷打气下反而成为压力，往往惊太早失波畀人「嘘爆」，通常开局都会踢得慢热兼患得患失，加上修夫基理念着重稳住中后场，所以「三狮兵」近8次主场出击，有7次半场开1球或以下。

　　安道尔初段够集中

　　世界排名156嘅安道尔一向有自知之明，只会专心踢防守，佢哋胜在半场集中力够，所以甚少大败，今年3月世杯外面对波兰，半场都只系输1粒，近8场赛事只有1次半场总入球多过1球，就系上场以2比0击败圣马力诺。不过呢场胜仗换嚟沉重代价，前锋佐迪彭拿及中场佩祖尔领黄，累积黄牌数目要停赛，冇咗两位中前场主将，相信佢哋会更专心防务，1.5球半场细有成2.88倍分头相当和味，钟意稳阵啲嘅球迷，亦可以考虑1.57倍嘅2.5球半场细。