世盃外：荷兰齐脚作客攞威

今晚世盃外欧洲区G组第4轮焦点大战，由挪威主场火并荷兰。荷兰有「方丈」尹戈尔第3度入主，佢老人家向来最讲面子，回归首骚唔衰得，球员落场都唔敢Hea踢，面对一味靠艾宁夏兰特单天保至尊嘅挪威，客胜好路。

　　荷兰喺今夏欧国盃16强止步，表现令拥趸失望，主帅法兰迪保亚众望所归冇得留低，但由于可拣人选有限，始终要搵嚟已经退休嘅尹戈尔接手。现年70岁嘅尹戈尔唔单止教过阿积士、巴塞、拜仁同曼联等豪门，之前曾两度出任荷兰主帅，其中2014年更率领「橙衣军团」夺得世盃季军，今次第3度入主，就扬言「除咗我仲可以拣边个」，充满霸气。

　　尹戈尔领军方针向来相当强硬，如果你唔弗，话之你係李华度定尹佩斯都冇面畀，但唔代表佢唔讲道理，由于中场云迪碧克喺曼联长坐冷板，「方丈」专程打电话同佢倾足45分锺，详细解释佢今次落选嘅原因。而且尹戈尔今次回归时间非常好，因伤抖咗近乎成季嘅铁卫华基尔云迪积克，已经好番并获征召，佢喺利物浦亦慢慢回复最佳水平，有番呢支后防定海神针，配合法兰基迪庄、韦拿杜姆及迪比等骨乾，阵容整齐晒。

　　艾宁夏兰特踢国家队冇料到

　　查实挪威同荷兰一样，喺头3轮世盃外取得2胜1负，佢哋虽然有射手艾宁夏兰特崛起，但整体实力只係一般，加上呢位神锋喺国家队明显唔及效力多蒙特时咁抢镜，至少3轮世盃外都交白卷，不宜高估。加上近4次碰头「橙衣军团」赢晒，客胜属信心之选。