世盃外：葡萄牙欠默契半和爱得过

世盃外围赛欧洲区A组今晚上演葡萄牙主场迎战爱尔兰。葡萄牙星味十足，但踢落始终冇乜化学作用，球员间欠缺默契，搞到近年表现唔理想，包括今届欧国盃16强止步；爱尔兰踢法硬朗之余防守尚算稳阵，近7场有6次上半场同对手打成平手，可博半场和。

　　葡萄牙拥有C朗拿度、般奴费南迪斯、迪亚高祖达及贝拿度施华等猛将，整体质素胜爱尔兰，预料今场可以佔上风。不过佢哋想喺早段入波并唔容易，皆因部分主力踢国家队嘅表现远不及球会，特别係中场般奴费南迪斯，佢上季英超为曼联贡献18球及12次助攻，但喺今届欧洲盃表现一无是处。

　　爱尔兰作风保守

　　事实上，「般费」多年来为国家队33次上阵仅入4球，影响力唔係想象中咁大，意味葡萄牙仲要靠C朗单天保至尊，虽然佢係今届欧国盃神射手，但5个入波有3球来自12码，脚风不及踢球会时咁顺，加上C朗刚落实回巢曼联，为免受伤影响出战英超，可能会较「锡身」，葡萄牙想喺上半场领先有一定难度。

　　爱尔兰大部分主力效力英超球队，佢哋向来采取传统英式硬朗踢法，面对技术型球队，往往收得不俗成效。爱尔兰近4次对葡萄牙获得1胜2和1负，表现并唔输蚀，加上佢哋作风保守，近7场6次半场同对手打和，都有力顶住半场和波。