美斯未登场 PSG半场Ｗ威比你睇

巴黎圣日耳门（PSG）周六凌晨法甲再度出击，作客弱旅比斯特。虽然「球王」美斯据报今场仲未会披甲，不过PSG本身阵容大超班，而且有多位主力复出，实力远超以护级为目标嘅主队。喺状态大勇嘅基利安麦巴比领军下，可望轻松由头赢到尾，半场客胜值捧。

　　人气球队PSG嘅阵容喺法甲近乎「屈机」，即使美斯、尼马等较迟归队嘅球星，预计今场唔会上阵，球队阵容依然星光熠熠，而且门将基安卢基当拿隆马、中场马高华拉堤、中坚马昆奴斯哥利亚等都已有两个星期练习，据报有机会喺今场上阵，阵容更见完整。

　　比斯特差几班输少当赢

　　PSG开咧两连胜，球员状态颇为理想，尤其基利安麦巴比已经上晒力，上场4比2大破斯特拉斯堡交出1射1传，PSG半场已经轻松领先3球；另一阿根廷前锋莫路伊卡迪亦都连续两场入波，而且两球都喺上半场建功，证明佢入局快，为争夺正选位置施展浑身解数。

　　比斯特喺法甲头两轮打和里昂同雷恩，今场会死守求抢分，不过气势强劲嘅PSG，为免畀比斯特打起个势，一众大勇球星预计会喺早段即展开强攻，务求尽快打破僵局。翻查纪录，PSG近6次对比斯特都能够喺半场领先，今仗开半场客胜机会高唱入云。