欧国盃今晚爆发终极一战，英格兰喺主场温布莱球场同意大利争冠。两军今届都以稳健防守过关斩将，意大利法定时间6战只失2球，英格兰更仅失1球，防守密不透风，预料「三狮」领队修夫基会更加保守，加上以往欧国盃决赛入波都唔多，近9届法定时间有8次总入球为2球或以下，强烈推介2.5球入球细。
欧国盃经历连场激战后，嚟到最重要一仗，英格兰自1966年世盃后首度杀入大赛决赛，意大利亦希望自1968年夺冠后，再次登上欧洲之巅，两队都想实现超过半世纪嘅梦想，球员同领队压力之大无法想像，唔多唔少都会影响表现。
所谓「进攻赢掌声，防守赢冠军」，近9届欧国盃决赛分子如法国、葡萄牙、西班牙及德国等，都係进攻了得嘅劲旅，但有8届决赛法定时间入波都唔多，当中有6届喺90分钟分胜负，最终王者均以不失球赢波，证明防守先係夺冠嘅关键。
两军前线把握力唔突出
今届决赛双雄均防守了得，意大利两位年逾30岁嘅中坚邦路斯同基亚连尼尽显老练经验；英格兰防守由中场做起，加云菲腊斯同迪格兰赖斯成为防线前最坚固屏障，修夫基今届改变踢法，捱过赛事初段被指踢法沉闷嘅批评，依家杀入决赛换来掌声。
不过两军虽然防守出色，但前线把握力未算突出，表面上意军今届有多名球员入到波，实情係冇一位可以信赖嘅射手，恩莫比尼同恩斯治尼就频频浪费机会。英军主要靠哈利卡尼搵食，但目标太大对手易作出针对性部署，估计决赛入波唔会多，一于捧入球细。
发表评论