意军攻守兼备上盘稳开

　　欧国盃16强淘汰赛今晚展开，焦点必定係「双利之战」意大利出战奥地利，今场喺中立场伦敦温布莱举行。以首名出线嘅意大利今届走势凌厉，不但3场分组赛全胜，而且各项赛事已经11连胜，兼保持不失球，可以话係攻守兼备。加上双方近6次对赛，意大利获得5胜1和，意军让一球，照捧上盘。

　　意大利喺文仙尼执教之下，已经建立一套行之有效嘅战术系统，保持连续30场赛事不败，追平传奇名帅保素喺1939年创下嘅意大利史上最长不败纪录，同时连埋热身赛、欧国联同世盃外，呢支「蓝衣军团」已经连续11场赛事冇失波，比赛时间长达1,055分钟，对上一个攻破佢哋大门嘅人，已经要数到上年10月荷兰中场云迪碧克，只要今场保持清白之身，就可以追平意大利喺1972至74年间创下嘅连续12场不失球纪录。

　　分组赛大轮换抖到足

　　然而，破纪录都係其次，意大利今届的确有「冠军相」，喺提早取得16强席位下，领队文仙尼上场分组赛轮换8位正选球员，仍以1比0击败威尔斯，可见全队球员无论正选或后备，状态及士气都非常好。最重要係意大利经过上场轮换阵容后，一班主力获得时间休息，为今仗以至整个淘汰赛作好准备。

　　至于奥地利虽然喺3场分组赛取得2胜1负，但所赢两场对手只係弱队北马其顿、乌克兰，对住传统劲旅荷兰，则以0比2败阵，可见佢哋嘅实力同欧洲一线球队仍有一段距离，预料今场将处于被动局面，形势不乐观。