不容再失变阵抢Ｗ 西班牙波兰大驳火

　　周日凌晨欧国盃E组次轮焦点战，「狂牛」西班牙于主场火併波兰。两军同样喺首轮失分而回，今仗不容再失，上仗久攻不下嘅西班牙势变阵出击，「秘密武器」谢拉特摩兰奴奉命担正；波兰为抢分亦冇得再缩，加上近年交手例演入球骚，2.5球嘅入球大趁早买。

　　西班牙主帅安历基今次一意孤行唔召「皇马帮」，可惜佢仲未搵到最佳阵容，首轮面对瑞典，「狂牛」佔咗逾7成控球权，全场17次射门更远超对手，可惜箭头艾华路莫拉达频频失机，西班牙围攻下畀对手闷和0比0，难免令球迷失望。

　　谢拉特摩兰奴有望担正

　　虽然未能旗开得胜，但安历基深明今仗赢波嘅话，出线机会仍然乐观，相信会变阵争胜。有指中场堤亚高艾简达拿同谢拉特摩兰奴将重夺正选席位，加强侵略性，后者刚季为维拉利尔于联赛攻入23粒，係西甲入波最多嘅土炮，配合艾华路莫拉达嘅掩护，有望喺波兰身上搵到着数。

　　波兰首轮同样令人失望，以1比2不敌斯洛伐克，先有对方射门反弹门将施捷斯尼误摆乌龙，之后轮到中场主力基祖华克领红牌被逐，今仗要坐波监，非常黑仔，但为争出线抢分决心绝不下于「狂牛」，效力拜仁嘅32岁神锋罗拔利云度夫斯基，必定要把握剩馀唔多嘅机会，喺国际赛争取成就。两军近3次碰头全开3球或以上，求胜心切下驳火难免，2.5球大盘更可取。