双牙会闷战吼和局

狂牛未执掂葡国例锡身
　　今晚另一场国际热身赛上演「双牙会」，西班牙主场迎战葡萄牙。西班牙今次欧国盃大胆弃用「皇马帮」，依家嘅人脚磨合需时，葡萄牙「拍跳」唔慌会搏，加上近年碰头经常打和，随时和气收场。

　　西班牙冇「皇马帮」
　　「狂牛」西班牙喺欧国盃被编入E组，同组有波兰、斯洛伐克及瑞典，「狂牛」今次只选咗24人征战，更係史上首次冇徵召皇马球员参加大赛，包括35岁队长兼精神领袖沙治奥拉莫斯，因养伤多时状态不足，令佢连续参加8届大赛嘅美梦落空。就算係其馀两支西甲劲旅巴塞隆拿及马德里体育会，合共只得5人入伍，最弊係主帅安历基频频试阵，但连主力阵容都未有定桉，令人担心。

　　衞冕嘅葡萄牙喺欧国盃位处F组，同组有德国、法国及匈牙利，阵中除有王牌C朗续担大旗外，迪亚高祖达、安达施华、贝拿度施华及鲁宾戴亚斯等冒起，实力有增无减。不过葡军出战热身赛例锡身，近8仗「拍跳」只得3胜4和1负，喺正选腹稿大定下，为免喺欧国盃开打前出现伤兵，势必避重就轻。两军近3次正面交锋，法定时间全部打和，其中两仗更係互交白卷，今仗打和唔奇。