西维尔窒住道气皇马踩多脚

今晚西甲续有争标关键战，2哥皇家马德里主场硬撼4哥西维尔。啱啱喺欧联出局嘅皇马得番联赛可争，挟近14场联赛不败之势，关键时刻唔会甩拖；西维尔上场输波打窒道气，近年碰头又畀「银河舰队」食住，主胜值得捧场。

　　皇马虽有中坚华拉尼受伤，好彩左闸费兰特文迪已经伤愈，之前确诊嘅费达历高华维迪亦都好番，阵容较为完整。呢支衞冕之师自1月尾不敌利云特后，近14场联赛取得10胜4和，其中8场保持清白之身。皇马上季就係靠稳健防守，季尾一口气连场小胜而封王，睇嚟主帅施丹想重施故技，力图稳中求胜。尤其依家西甲成为佢哋最后捧盃希望，肯定唔会放软手脚。

　　西维尔自欧联16强出局后，联赛一度缔造8战7胜1和佳绩，本来争标要预埋佢哋，不过上仗主场被毕尔包偷袭得手输0比1，未计今轮已落后榜首马德里体育会6分，被打窒士气之馀，同场仲有主帅卢比迪古被逐，今仗无缘倒戈，难免影响军心。加上近4次交手「银河舰队」全胜，摆明格食格，一于捧主胜。