狮吼上力再噬水手

今季澳职各队实力平均，前列球队近期接连失分下，目前排第9位嘅布里斯班狮吼，近况反而係最好一队，为争夺季后赛入场券，今日作客中岸水手都会主动出击博赢波。布里斯班狮吼有当时得令嘅日本新星檀崎龙孔压阵，面对后防演出大跌Watt嘅中岸水手有力数胡，开客胜机会颇高。

日本新星大爆发

狮吼目前虽排第9位，但由于佢哋只係比赛咗15场，比起前列球队踢少3至4场，所以只要急起直追，争入季后赛前景仍然乐观。狮吼自2月份进入8场不胜低潮后，近期状态稳步上扬，最近连赢FC麦克阿瑟同西悉尼流浪者，将不败走势增至4场，球员士气高昂。佢哋复甦最大嘅原因，係日本20岁新星檀崎龙孔大爆发，呢位右翼已经连续3场联赛建功，成为球队赢波锁匙人。

主队中岸水手未能承接开季强势，上场领先2球下再因后防犯错畀FC悉尼逼和2比2，对上7场联赛只得1胜，中岸水手喺呢7场比赛都有失波，后防演出错漏极多。翻查往绩，狮吼近4次联赛对中岸水手全部赢晒，今场可以放心捧客W。