客战仲醒AC反转拉素

今晚意甲重头戏，拉素主场迎战AC米兰。拉素上场联赛以2比5不敌拿玻里，再次暴露防线不稳问题，争前4机会大受打击。AC米兰今季一反传统，作客表现更胜主场，其中近9场联赛作客赢咗8场，客W值得追捧。

　　拉素早前一度取得联赛5连胜，但要留意当中对手相对较弱，上场遇前列劲旅拿玻里，立即陷入劣势，一度落后4球，及后因为对手有所鬆懈，先至追番两球，但最终仍然大败2比5。事实上拉素防线唔多稳阵，早前主场对弱队宾尼云图，都失咗3球，换言之近两场合共失8球。拉素今季往往遇强即屈，除咗上场2比5不敌拿玻里外，今季主场亦曾以1比4被阿特兰大击溃，同埋2月对国际米兰以及3月对祖云达斯，都输波收场，首循环亦以2比3不敌今仗对手AC米兰，形势唔乐观。

　　AC今季作客叻过主场，17场联赛主场仅7胜，反而15场作客赢咗13场，属意甲「作客王」。虽然射手伊巴谦莫域有伤在身，难以上阵，但仍然有列比锡、拉菲尔利亚奥及基尔斯等中前场勐将，攻力有保证。同埋佢哋近4场联赛作客都赢波，包括击败拉素嘅同市球队罗马，今场再前赴首都比赛，绝对有力再下一城，直取客胜。