李斯特城迎西布朗做大事

今晚英超有场独脚戏，李斯特城主场斗西布朗；「狐狸」虽然啱啱杀入英足盃决赛，不过联赛前4位置未算稳阵，今场唔可以放鬆；西布朗护级水深火热，嚟紧每场都要当决赛踢，睇番两队近8次联赛交锋有6次开3球或以上，一于捧2.5球大盘。

　　伊恩拿祖近7场轰10粒
　　李斯特城上场英足盃4强以1比0小胜修咸顿，相隔52年杀入决赛，不过佢哋联赛接连输畀曼城及韦斯咸，依家比第4及第5位嘅车路士、韦斯咸只多1分，就连排第7嘅热刺亦只係少佢哋6分，一个唔觉意随时连欧霸资格都冇埋，现阶段仍要积极抢分。上场一箭定江山嘅尼日利亚射手伊恩拿祖近7场劲轰10粒，脚风顺到冇朋友，配合近期频有助攻嘅占美华迪更加如鱼得水。

　　西布朗近两场联赛先后大胜车路士及修咸顿，擸尽6分后护级露出微些曙光，现时比尾4嘅般尼少9分但少踢一场，想成功护级作客冇得拣照攻。两军近8次联赛交手主场一方从未试过赢波，唔排除西布朗今场有抢分机会，睇番上述8次交锋，两军一共合力炮製28球，6次开3球或以上，今场捧大最稳阵。