作客仲醒爱华顿下盘收礼

今晚英超双响炮，尾场「海鸥」白礼顿主场斗爱华顿。白礼顿实力差一皮，今仗要让波有啲离谱；爱华顿力争欧洲赛资格，加上客场特醒，受让平半下盘笋到爆。

　　常言道好运紧要过好波，白礼顿正係反面教材，喺主帅朴达带领下，重视控制比赛节奏，可惜经常赢形势失分，好似上仗领先下被曼联反胜2比1，就係最新例子。佢哋近8仗联赛只得2胜2和4负，状态麻麻。查实「海鸥」领先尾3嘅富咸6分，抢分压力唔算大，战意未能尽信。爱华顿近3仗联赛只得1和2负，主要受伤患困扰，好彩进攻核心占士洛迪古斯上仗打和水晶宫有士哥，有助提升信心，加上佢哋作客醒过主场，近8场联赛客场获6胜1和1负，今仗有得受让必捧下盘。

　　西布朗添信心大斗修咸顿

　　至于头场西布朗主场对修咸顿。尾2嘅西布朗上仗爆冷赢车仔5比2，信心返晒嚟，护级仲未绝望必藉地利抢攻。修咸顿上场作客反胜般尼3比2，近4场总入球全开3球或以上，捧2.5球嘅入球大最划算。