实力有限状态又曳
今晚英超独脚戏，富咸主场迎战狼队，两队都处于颓势，富咸3连败，深陷降班区，急需抢分护级，但碍于实力有限，想赢都有心冇力。至于狼队状态低迷，近5场未赢过，今场可以话係海军斗水兵「水斗水」，双方都欠缺取胜把握。加上以往碰头入球数字亦偏少，两军近5次交锋，总入球都係2球或以下，最好拣中位数2.5球嘅入球细。
富咸今季昇上英超后，一直喺联赛榜下游挣扎，明显未够班喺英超立足。呢支伦敦球队现时排尾3，落后尾4纽卡素3分，兼踢多1场，护级形势非常险峻。特别係领队柏加只有两年教波经验，恐怕无力率领球队走出困境，事实上，之前已经多次传出会方可能解僱呢位40岁少帅，难免影响军心。
卢卡文缺阵雪上加霜
富咸仲有一个死穴，就係入球能力低，16场联赛主场只入9球，其中近10场联赛主场有7场未能取得入球。前锋卢卡文、中场卡亚尼受伤，进一步削弱球队进攻力，尤其係卢卡文属于阵中第2号射手，佢缺阵之下，令富咸锋线雪上加霜。
另一边厢，狼队已经无复过去两季之勇，近5场英超只有2和3负，跌至14位，幸好佢哋同降班区仲有一段距离，暂时唔需要烦恼护级问题。不过，亦因为狼队欠缺抢分动力，唔好期望佢哋会有突出表现。更何况狼队作客成绩非常差，近10场联赛作客仅有1胜，加上狼队中场指挥官摩天奴养伤，组织攻势能力下降，要击败富咸就更加困难。双方都冇可取之处，宁愿拣入球细。
发表评论